January 25, 2022

ለታላቁ የኢትዮጵያ ህዳሴ ግድብ እስካሁን 120 ቢሊዮን ብር ወጪ መደረጉ ተገለጸ

August 20, 10:54 am | @EBC


የግድቡ አጠቀላይ ግንባታም 75 በመቶ መድረሱ ተጠቁሟል። የታላቁ የኢትዮጵያ ሕዳሴ ግድብ አሁን ያለበትን ደረጃ በተመለከተ ጠቅላይ ሚኒስትር ዐቢይ አሕመድ እና ምክትል ጠቅላይ ሚኒስትር ደመቀ መኮንን በተገኙበት ገለጻ ተደርጎላቸዋል። ገለጻውን ያደረጉት የታላቁ የኢትዮጵያ ሕዳሴ ግድብ ዋና ሥራ አስኪያጅ ኢ/ር ክፍሌ ሆሮ ናቸው። ግድቡን ለማጠናቀቅም 160 ቢሊዮን ብር እንደሚፈጅ ኢንጅነሩ ተናግረዋል። በዚህም ወቅት ግድቡ ከሚያስፈልገው 10 ነጥብ 5 ቢሊየን ኪዩብ ውኃ የመያዝ አቅም ውስጥ በአሁኑ ወቅት የሲቪል ሥራው 88 በመቶ መጠናቀቁ ተገልጿል። የኤሌክትሮ መካኒካል ሥራው ጋር በተያያዘ 9ኛ እና 10ኛ ዩኒትን ኤሌክትሪክ ኃይል ለማስጀመር የሚያስችሉ ሥራዎች እየተሠሩ የሚገኙ ሲሆን፣ በጥቅሉ ኤሌክትሮ መካኒካል ሥራው 46 በመቶ መድረሱ ተነግሯል። የብረታ ብረት ሥራዎች እንዲሁ 33 በመቶ መድረሳቸው የተገለጸ ሲሆን፣ የግድቡ አጠቃላይ ሥራ 75 በመቶ ደርሷል ተብሏል። ግድቡ በአሁኑ ወቅት 560 ድረስ መሙላቱ የተገለጸ ሲሆን ወደ 595 የማሳደግ ሥራዎች እየተሠሩ መሆኑ ተመልክቷል። ግድቡ እስካሁን የያዘው ውኃ 80 ኪ.ሜ እንደሸፈነም ተገልጿል። በ2013 ዓ.ም የቅድመ ኃይል ማመንጨት ሥራ ማጠናቀቅ እና የግድቡን ከፍታ የማሳደግ ሥራዎች ትኩረት ይሰጣቸዋል ተብሏል። የግድቡ ግንባታ ሲጀመር 78 ነጥብ 3 ቢሊየን ብር ተይዞ የነበረ ቢሆንም፣ በመዘግየቱ የተነሣ እስካሁን ድረስ ባለው ጊዜ ብቻ 121 ነጥብ 5 ቢሊየን ብር ወጥቷል፤ ግድቡ ሲጠናቀቅ በድምሩ 160 ቢሊየን ብር ይፈጃል ተብሏል። ይህም መጀመሪያ በዕቅድ ከተያዘው እጥፍ ወጪ መሆኑ ተመልክቷል። ጠቅላይ ሚኒስትር ዐቢይ ገለጻውን ተከትሎ በሰጡት አስተያየት የግድቡ ግንባታ መዘግየት የወጪ መናር በማምጣት ዋጋ አስከፍሎናል፤ ስለሆነም ግድብን በተያዘለት 2015 ዓ.ም ላይ ማጠናቀቅ አስፈላጊ ነው ብለዋል። ከዚህ ባሻገር በተያዘው ዓመት በግድቡ ላይ የተከናወኑ ተግባራት የሚያኮሩ መሆናቸው እና የታቀዱ ሥራዎች መፈጸም እንደሚቻል ማሳያ መሆኑም ተገልጿል። ይህም ያሉብ ችግሮች አርመን ትልልቅ ፕሮጀክቶች በማከናወን ለትውልድ ቅብብሎሽ ማስቀጠል እንደሚቻል ያረጋገጥንበት ነው። ከዚህ ባሻገር ልማቶቻችንን እኛው ኢትዮጵያውያን ማከናወን እንደምንችል ማሳያ ነው ተብሏል። መንግሥት የግድቡን ግንባታ ለማገዝ አስፈላጊውን ሁሉ ድጋፍ እንደሚያደርግም ጠቅላይ ሚኒስትሩ ገልጸዋል። በአስማማው አየነው