August 3, 2020

የአፍሪካ አገራት የኮቪድ-19 ስርጭትን ለመግታት የጣሏቸው ገደቦችን ማላላታቸው ተገቢነት የለውም-የዓለም ጤና ድርጅት

July 31, 2:42 pm | @EBC


ድርጅቱ አፍሪካውያን መንግሥታት የምርመራ እና የንክኪ ክትትል ተግባራትን አጠናክረው እንዲቀጥሉ መጠየቁን ቢቢሲ ዘግቧል። የዓለም ጤና ድርጅት የአፍሪካ ዳይሬክተር ዶ/ር ማቲሺዶ ሞኤቲ፣ የአፍሪካ አገራት “ሁላችንም ደህና መሆናችን እስኪረጋገጥ ድረስ ማንም ደህና አለመሆኑን” ሊያስታውሱ ይገባል ብለዋል። በአሁኑ ወቅት በአኅጉሪቱ በኮሮናቫይረስ የተያዙ ሰዎች ቁጥር ከ900 ሺህ በላይ ቢደርስም፣ አንዳንድ አገራት የጣሉትን እገዳ ማላላት ጀምረዋል ተብሏል። እንደ ሞሮኮ ያሉ አገራት ደግሞ ወረርሽኙ እንደገና ማገርሸቱን ተከትሎ ገደቦችን መልሰው እያስቀመጡ ይገኛሉ። “በአፍሪካ የወረርሽኙ ታማሚዎች ቁጥር አንድ ሚሊየን ገደማ በመቃረቡ፣ አኅጉሪቱ ወሳኝ ወቅት ላይ ትገኛለች” ሲሉ ዶ/ር ሞኤቲ ሐሙስ ዕለት በሰጡት ጋዜጣዊ መግለጫ ተናግረዋል። በአፍሪካ ከጠቅላላው የታማሚዎች ቁጥር ውስጥ 75 በመቶ ገደማ በአምስት አገራት ውስጥ ብቻ የሚገኙ መሆኑንም ጠቅሰዋል። በአፍሪካ የበሽታዎች መከላከያ እና መቆጣጠሪያ መረጃ መሠረት በአፍሪካ ከአራት ሞቶች መካከል ሦስቱ በደቡብ አፍሪካ፣ ግብጽ፣ ናይጀሪያ፣ አልጀሪያ እና ሱዳን ውስጥ የተመዘገበ መሆኑን ያመለክታል።