August 3, 2020

በአፍጋኒስታን በተሽከርካሪ ላይ በተጠመደ ቦምብ 17 ሰዎች ለህልፈት ተዳርገዋል

July 31, 10:38 am | @FANA


የቦምብ ፍንዳታው ሎጋር በተባለው ግዛት አስተዳደር ቢሮ ህንጻ አቅራቢያ በርካታ ሰዎች የበዓል ግብይት በሚፈጽሙበት ወቅት የተፈጸመ ነው ተብሏል፡፡ ፍንዳታው ታጣቂው ታሊባን ከአፍጋን መንግስት ጋር ለኢድ አል አድሃ አረፋ በዓል የተኩስ አቁም ስምምነት ለማድረግ በተስማማበት ዋዜማ የተፈጸመ ነው፡፡ ዛሬ የሚጀምረው የተኩስ አቁም ስምምነት ለሶስት ቀናት የሚቆይ ነበር፡፡ ታሊባን በጥቃቱ እጀ የለበትም ያለ ሲሆን በአንጻሩ አሸባሪው አይ ኤስ በጉዳዩ ላይ ያለው ነገር የለም፡፡ የግዛቲቱ አስተዳዳር ቃል አቀባይ ዴዳር ላዋንግ ጥቃቱ በአጥፍቶ ጠፊ የተፈጸመ ሳይሆን አይቀርም ብለዋል፡፡ የአፍጋን መንግስት እና ታጣቂው ታሊባን ለመድረስ ያሰቡት የተኩስ አቁም ስምምነት በእስረኞች ልውውጥ ሳቢያ እክል ገጥሞታል፡፡ የአሽረፍ ጋኒ አስተዳደር ታሊባን የያዛቸውን 1 ሺህ የመንግስት የደህንነት ሰዎች ከለቀቀ 5 ሺህ የታሊባን አባላትን ለመልቀቅ ተስማምተዋል፡፡ በመንግስት በኩል እስካሁን ከ4 ሺህ 400 በላይ የታሊባን አባላት የተለቀቁ ሲሆን ታሊባን በበኩሉ 1 ሺህ 5 የአፍጋን የፀጥታ አካላትን መልቀቁን አስታውቋል፡፡ ምንጭ፣ ቢቢሲ