July 8, 2020

ፌስቡክ ‘መጥፎ’ መልእክት የያዙ ጽሑፎች ላይ ምልክት ማድረግ ሊጀምር ነው

June 27, 12:29 pm | @EBC


ፌስቡክ የአሜሪካው ፕሬዚዳንት ዶናልድ ትራምፕ የሚለቋቸውን ጽሑፎች ጨምሮ ማናቸውም ጉዳት ሊያደርሱ የሚችሉ ጽሑፎች ይዘት ላይ ምልክት እንደሚያደርግ አስታውቋል። ከ90 በላይ የሚሆኑ ማስታወቂያ አስነጋሪ ድርጅቶች ፌስቡክን ለምርቶቻቸው ማስተዋወቂያነት ከመጠቀም መታቀብ የተጀመረውን ዘመቻ ተቀላቅለዋል። ግዙፉ የግብይት ኩባንያ የሆነው ዩኒሊቨር በትላንትናው ዕለት በአሜሪካ “ጽንፈኛ የምርጫ ወቅት” እየተከናወነ ነው በሚል በፌስቡክ ላይ የተጀመረውን የማዕቀብ ዘመቻ መቀላቀሉን ይፋ አድርጓል። ዶቭ የተሰኘው ሳሙና እንዲሁም ቤን ኤንድ ጄሪ አይስ ክሬም አምራቾች አሜሪካ ውስጥ “ቢያንስ” እስከ 2020 (እ.አ.አ) ትዊተር፣ ፌስቡክ እና ኢንስታግራም መጠቀም እንደሚያቆሙ አስታውቀዋል። “በዚህ ወቅት በእነዚህ የማኅበራዊ የማስታወቂያ መንገዶች መጠቀም ለሕዝቡ እና ለኅብረተሰቡ ምንም የሚፈይደው ነገር የለም” ያሉት ድርጅቶቹ “አስፈላጊ ከሆነ አሁን ያለንበትን አቋም እንደገና ልንከልሰው እንችላለን” ብለዋል። ግፊቱን ተከትሎ የፌስቡክ ሓላፊ ማርክ ዙከርበርግ ዓርብ ዕለት ባደረገው ንግግር ድርጅታችን የጥላቻ ንግግርን ከገጹ በማውረድ ረገድ መልካም ስም አለው ብሏል። ለአብነትም በያዝነው ወር ውስጥ የአውሮፓ ኮሚሽን ባወጣው ሪፖርት እ.አ.አ 2019 ላይ ፌስቡክ 86 በመቶ የጥላቻ ንግግር ከገጹ ላይ ማጥፋቱን፣ ይህም እ.አ.አ 2018 ላይ ከነበረው 82 ነጥብ 6 በመቶ የበለጠ መሆኑን ጠቅሷል። ሆኖም ግን “አገሪቱ ከገጠማት ተግዳሮት እና በማኅበረሰባችን ውስጥ ካለው እውነታ አኳያ” ፌስቡክ ፖሊሲዎቹን ማጥበቅ ጀምሯል ሲል ተናግሯል። በዚህም መሠረት ፌስቡክ ዘር ወይም መጤነት መነሻ የሚያደርጉ ማናቸውም ማስታወቂያዎችን እንደሚያግድ አስታውቋል። በተጨማሪም ፖለቲከኞችን ጨምሮ ብጥብጥ ወይም የምርጫ ድምፆችን የሚያፍኑ ይዘቶችን እንደሚያስወግድ ገልጿል። ፌስቡክ ካስቀመጣቸው መስፈርቶች ያፈነገጡ እና “ችግር” ያለባቸው ይዘቶች ላይ እንዲሁ ምልክት ማድረግ እንደሚጀምር አመልክቷል። ባለፈው ግንቦት ወር ውስጥ በነጭ አሜሪካውያን ፖሊሶች እጅ የተገደለውን ጥቁር አሜሪካዊ ጆርጅ ፍሎይድ ተከትሎ በአሜሪካ የሲቪል መብቶች አቀንቃኝ ቡድኖች “ጥላቻን ለትርፍ መጠቀም ይቁም” የሚል ዘመቻ መጀመሩ ይታወሳል ሲል ቢቢሲ ዘግቧል።