July 8, 2020

ዓለም አቀፉ የኦሎምፒክ ኮሚቴ የኮቪድ-19 ወረርሽኝን ለመግታት ከዓለም ጤና ድርጅት እና የተመድ ጋር ቅንጅት ፈጠረ

June 24, 5:29 pm | @EBC


የሦስቱ ድርጅቶች ጥምረት እና የኦሎምፒክ አትሌቶች በጋራ ሆነው በዓለም አቀፍ ደረጃ ጤናማ ሆኖ መቆየት ንቅናቄ እና የኮቪድ-19 ተፅዕኖ ለመግታት ይሠራሉ ተብሏል። የኦሎምፒክ አትሌቶች ጠቃሚ የሆኑ የጤና መልእክቶች በማስተላለፍ ሕዝቡ ወረርሽኙን ለመግታት የሚረዱ ለውጦችን እንዲያመጣ ብሎም አካላዊ እና አእምሮአዊ ጤናን የሚያጎለብቱ ወሳኝ መረጃዎችን እንዲያገኝ በማድርግ ድጋፍ ያደርጋሉ ተብሏል። የዓለም ጤና ድርጅት ባደረገው የዳሰሳ ጥናት የከፋ የኮቪድ-19 ሕመም ያለባቸው ሰዎች ሌሎች ተላላፊ ያልሆኑ ሕመሞች ጋር የሚኖሩ ወይም ለመሰል ችግሮች ሊያጋለጡ የሚችሉ መሆናቸውን አመልክቷል። በመሆኑም ንቁ አካላዊ አቋም መያዝ፣ ጤናማ አመጋገብ መኖር እንዲሁም ትምባሆ እና አልኮል ማስወገድን የያዘ ጤናማ አኗኗርን መከተረል ወሳኝ መሆኑን ጥናቱ ጠቁሟል። “የሰዎችን ሕይወት ለመታደግ የሚያስችሉ ጤናማ መልእክቶች ለማስተላለፍ ከዓለም አቀፉ የኦሎምፒክ ኮሚቴ ጋር በአጋርነት በመሥራታችን ደስተኞች ነን። የኦሎምፒክ አባላት የኮቪድ-19 ወረርሽኝን መቋቋም የሚችል ጤናማ ኅብረተሰብ እንዲፈጠር የሚያግዙ መልእክቶችን ለማስተላለፍ ድጋፍ ያደርጉልናል” ሲሉ የዓለም ጤና ድርጅት ዋና ዳይሬክተር ዶ/ር ቴድሮስ አድኃኖም ተናግረዋል። ባለፉት ስድስት ወራት የኮቪድ-19 ወረርሽኝ በእያንዳንዱ የዓለማችን ክፍል እና በእያንዳንዱ ሰው ሕይወት ውስጥ ተፅዕኖ ፈጥሯል። የዓለም ሕዝብም ዓለም አቀፍ ተቋማት በጋራ እንዲሠሩ እና መሪዎች ተጨባጭነት ያለው ተአማኒ መረጃ ከታማኝ ምንጮች እንዲሰጡ ይጠብቃል። የኦሎምፒክ አትሌቶች ደግሞ የጥንካሬ ተምሳሌት የሆኑ እና መሰል መረጃ ለማድረስ ተአማኒ መልእክተኞች ናቸው ተብሏል። የዓለም አቀፉ ኦሎምፒክ ኮሚቴ ፕሬዚዳንት ቶማስ ባች በበኩላቸው፣ “ስፖርት ሕይወትን መታደግ ይችላል። ባለፉት ጥቂት ወራት ስፖርት እና አካላዊ እንቅስቃሴ ለጤና እና ድህንነት አስፈላጊ ነገር መሆኑን ተረድተናል። ከዓለም ጤና ድርጅት እና ከተመድ ጋር አብሮ መሥራት በጋራ ወደ ሌላ ምእራፍ ተሸጋግረናል። የኦሎምፒክ አትሌቶቻችን ዓለም በአሁኑ ወቅት የሚፈልገውን መረጃ እና የተሻሉ ተሞክሮዎችን እንዲያካፍሉ እንጠይቃለን” በማለት ጥሪ አቅርበዋል። የተመድ ዋና ፀሐፊ አንቶኒዮ ጉትሬዝ ደግሞ፣ “ከኮቪድ-19 ወረርሽኝ እስከ ዘረኝነት እና ማኅበራዊ ፍትሕ እጦት፣ የአየር ንብረት ቀውስ የመሳሰሉ ፈታኝ የተግዳሮት እና ለውጥ በሚታዩበት ወቅት፣ ዓለም አቀፍ ትብብር እና ተስፋ አስፈላጊ ነው። የኦሎምፒክ ንቅናቄ እና አትሌቶች ደግሞ ለሰብአዊነት መልካም ተምሳሌት ናቸው። የተመድ ከዓለም አቀፉ የኦሎምፒክ ኮሚቴ እና የዓለም ጤና ድርጅት በጋራ ሆነን የዓለም ሕዝብ እንዲተባበር እና በጋራ ጤናማ እንሁን የሚል ጥያቄ ያቀርባሉ ማለታቸውን የዓለም ጤና ድርጅት ዘግቧል፡፡