July 8, 2020

እንደ ሃገር የምንፈተንበት እንደ ዜጋ የምንመዘንበት ወቅት አሁን ነው- በውጭ ሀገራት የሚኖሩ ኢትዮጵያዊያን ምሁራን

June 24, 12:24 pm | @FANA


እኛ በኢትዮጵያዊያን ለዘላቂ ለውጥ በሚል መጠሪያ የተሰባሰቡት በአውሮጳ፣ በሰሜን አሜሪካ እና በመካከለኛው ምስራቅ የሚኖሩ ኢትዮጵያዊያን እና ትውልደ ኢትዮጵያዊያን ምሁራን እና ሙያተኞች በኢትዮጵያ ወቅታዊ ሁኔታ ተስፋና ፈተናዎች ዙሪያ የቪዲዎ ውይይት አድርገዋል። በዚህ ወቅትም የኮሮና ወረርሽኝ በህይወትና በማህበራዊ ኑሮ እንዲሁም በምጣኔ ኃብት ላይ በኢትዮጵያ በሚያደርሰው ጫና ዙሪያ ውይይት አድርገዋል። በተለይ ዓለም አቀፉዊ የምጣኔ ኃብት ቀውስ በኢትዮጵያ የእድገትና የብልፅግና ትልም ላይ የሚፈጥረው ጫና እንዲሁም ከምርጫው ጊዜ ጋር ተያይዘው የሚነሱ ቅሬታዎች ዙሪያም ምክክር እንደተካሄደም ነው የተነገረው። በዋነኝነት ከአባይ ግድብ ጋር ተያይዞ በሃገሪቱ ላይ ሊኖር ስለሚችለው ወታደራዊ ትንኮሳን ከግንዛቤ በማስገባት ጊዜው ከግልና ከቡድን ጥቅም በላይ አንድነትና መናበብን የሚጠይቅ ነው ተብሏል። በወይይቱ በአሁኑ ወቅት ዜጎች የሃገሪቱን ህግ በማክበር ፣ የሙያተኞች፣ የሃይማኖት አባቶች እና የሃገር ሽማግሌዎች ምክር እና ሀሳቦች በማዳመጥ የቤተሰብና የአካባቢን ሰላም ጤና ደህንነት መጠበቅ የሚያስፈልግበት ጊዜ መሆኑም ተጠቁሟል። ከዚህ ውጭ በመቆም ሁኔታውን ለግል ወይም ለቡድን ጥቅም ለመጠቀም የሚሞክሩ ወገኖች የሚገጥማቸውን ውርደትና ውድቀት ሊያጤኑት ይገባል ብለዋል ምሁራኑ። ከቅርቡ የሃገራችን ታሪክ እንደምንማረው ሃገር አደጋ ላይ ስትወድቅ ከጠላት ጋር የቆሙ በቀጥታም ይሁን የሀገሪቷን ደህንነት በተዘዋዋሪ ለድርድር ያቀረቡ ተዋርደዋል ወድቀዋል ሲሉም ነው የገለፁት ። በመሆኑም ወቅቱ ሀገራችን እንደታላቅ ሃገር የምትፈተንበት እኛም ደግሞ እንደ ዜጋም ሆነ እንደ ልሂቅ የምንመዘንበት ወቅት ላይ ነንና በአንድነት በታላቅ የወገን ክብርና በሃገር ፍቅር ስሜት አብረን እንድንቆም በጥብቅ እናሳስባለን በማለት ጥሪ አቅርበዋል።