September 28, 2020

ጠቅላይ ምክር ቤቱ ህዝበ ሙስሊሙ የኢድ ሰላትን በየቤቱ እንዲሰግድ አሳሰበ

May 22, 12:51 pm | @huleAddis


የጠቅላይ ምክር ቤቱ ፕሬዚዳንት ቀዳሚ ሙፍቲ ሃጂ ኡመር እንድሪስ 1 ሺህ 441ኛውን የኢድ አል ፈጥር በዓልን በማስመልከት መልእክት አስተላልፈዋል።  በመልእክታቸውም ህዝበ ሙስሊሙ የዘንድሮውን የኢድ በዓል ሲያከብር የኮሮናቫይረስ የተከሰተበት ወቅት በመሆኑ በሽታው እንዳይሰራጭ ጥንቃቄ ማድረግ ይኖርበታል ብለዋል። በመሆኑም ሁሉም የኢድ ሰላትን በየቤታቸው ሆነው እንዲሰግዱ አሳስበዋል። በዓሉ ሲከበርም የተቸገሩትን በመርዳት፣ በመተጋገዝና በመተዛዘን እንዲሁም አንድነትን በሚያጠናክር መልኩ መሆን ይኖርበታል ብለዋል። 1 ሺህ 441ኛው የኢድ አልፈጥር በዓል ዛሬ ምሽት ጨረቃ ከታየች ቅዳሜ ዛሬ ካልታየች እሁድ ተከብሮ የሚውል መሆኑንም ገልጸዋል። የዘንድሮው የኢድ በዓል የሚከበረው መንግስት ለህዝበ ሙስሊሙ በአዲስ አበባ ዓለም አቀፍ መስጂድና ኢስላማዊ ማዕከል የመስሪያ ቦታ ባስረከበ ማግስት መሆኑንም ጠቅሰዋል። በዚህም በሙስሊሙ ማህበረሰብ ስም ለመንግስት ምስጋናቸውን አቅርበዋል። በመጨረሻም ለመላው የእስልምና ሃይማኖት ተከታዮች "እንኳን ለ1 ሺህ 441ኛው የኢድ አል ፈጥር በዓል አደረሳችሁ" ብለዋል። ENA