September 28, 2020

ታሪክን የኋሊት

May 21, 1:06 pm | @Sheger FM


እለቱ ማክሰኞ ነበር፡፡ በስድስት ሰዓቱ የኢትዮጵያ ሬዲዮ የዜና እወጃ፣ በሀገሪቱ የነበረውን ደም ማፈሰስ ለማስቆም ሲባል ፕሬዚዳንት መንግስቱ ከሀገር እንዲወጡ መደረጉን ተናገረ፡፡ በማግስቱ ግን ለማንም ሳያሳውቁ ሸሸተው፣ መሄዳቸውን የመንግስት ምክር ቤት መግለጫ ሰጠ፡፡ ሌፍተናንት ጀነራል ተስፋዬ ገ/ኪዳንም የሀገሪቱ ፕሬዝዳንት ሆነው የተሰየሙት በዛሬው ቀን ነበር፡፡ ሌተና ኮሎኔል መንግስቱ፣ የተቀሰቀሰውን ህዝባዊ አመፅ በአዝጋሚ መፈንቅለ መንግስት እጁ ያደረገው ወታደራዊ ጁንታ (ደርግ) ሊቀመንበር ነበሩ፡፡ የኢሠፓ ዋና ፀሀፊ፣ የጦር ሀይሎች ጠቅላይ አዛዥ፣ የሀገሪቱ ፕሬዝዳንት በሚል በተደራረቡ ሹመቶች ራሳቸውን ሾመው ኖሩ፡፡ ይሁንና አስተዳደራቸው ገና ከጅምሩ ግድያን መፍትሔ በማድረጉ ተቃዋሚያቸው በዛ፡፡ መንግስታቸውን በመቃወም ተቃዋሚ ሀይሎች ጠመንጃ አንስተው ጥቃት ጀምረው ድል አገኙ፡፡ በ1983 ዓ.ም አጋማሽ ላይ፣ ተቃዋሚው የኢህአዴግ ሰራዊትም ወደ አዲስ አበባ በአሸናፊነት ገሰገሰ፡፡ ተቃዋሚዎቻቸው እንደተጠጓቸው ያዩት ኮሎኔል መንግስቱ፣ “እኛ እምንሞተውም እምንኖረውም ፣ እዚሁ ሀገራችን ነው” የሚለውን ንግግራቸውን ሰርዘው “ግንባሬ አሰከተበተነ ድረስ ትግሌን እቀጥላለሁ” የሚለውን ቃላቸውን አጥፈው ቤተሰባቸውን ይዘው ወደ ኬንያ ሸሹ፡፡ ወደ ኬንያ ለመሄዱ አውሮፕላን እንዲዘጋጀላቸው ያዘዙት ወደ ብላቴ ማስልጠኛ ገብተው ወታደራዊ ስልጠና በማድረግ ላይ የነበሩትን የዩኒቨርስቲ ተማሪዎችን እጎበኛለሁ በሚል ሰበብ ነበር፡፡ (1/2) ከብላቴ ወደ አስመራ ከዚያም ወደ አዲስ አበባ ለመመለስ በሚል ሰበብ፣ አውሮፕላኗ ነዳጅ እንድትሞላ አዘዙ፡፡ ረፋድ ላይ በረራቸውን ጀመሩ ግን በአየር ላይ እንዳሉ አውሮፕላኑ ወደ ናይሮቢ እንዲበር አስገደዱት፡፡ አብራሪው፣ አቅጣጫ ማሳያ ካርታ አለመያዙንና መብረር እንደማይችል አሳወቀ፡፡ ኮሎኔል መንግስቱ ግን “በግድ ትሄዳታለህ” ብለው አስገድደው አቅጣጫ አስለወጡት፡፡ በዚህ ድርጊታቸውም፣ የሀገር መሪ ሆነው፣ አውሮፕላን ለመጥለፍ፣ የመጀመሪያው መሪ ሆነዋል፤ ይሏቸዋል፡፡ ናይሮቢ አውሪፕላን ማረፊያ ሲደርሱ፣ በኢትዮጵያ ኤምባሲ ሁለተኛው ፀሀፊ ተቀበሏቸው፡፡ በዚያው የስደተኝነት ኑሯቸውን ወደሚገፉበት፣ ወደ ሀራሬ ከአምስት አጃቢዎቻቸው ጋር ሄዱ፡፡ ኮሎኔል መንግስቱ፣ በስልጣን ዘመናቸው ሀገሪቱን እርስ በርስ በሚያፋጅ ፖሊሲ፣ ለስልጣናቸው ቅድሚያ ሰጥተው፣ ሀገሪቱን የስቃይ እና የፍዳ መፈልፍያ አደረጓት፣፡ ታይቶ በማይታወቅ ውርደትም ከተቷት የሚሏቸው አሉ፡፡ አንዳንዶች ደግሞ ማህበራዊ ለውጥ ለማምጣት የመሬት አዋጅን የመሳሰሉ ለማስፈፀም ጥረት አድርገዋል ይሏቸዋል፡፡ ሁሉም ግን በስልጣን ጥማት የታወሩ መሆናቸውን እና በስልጣናቸው ከመጡባቸው ማንኛውንም አደጋ ለማድረስ የማይተኙ አምባገነን መሆናቸውን ይናገሩላቸዋል፡፡ በዘመነ መንግስታቸው፣ እርስ በርስ በተደረገ ፍጀት እና ጦርነት፣ በሚሊዮኖች የሚቆጠሩ ዜጐች አልቀዋል፡፡ የዲሞክራሲ መብቶች የሚባሉ ነገሮች እንኳን በውን በሕልም የማይታስብበት፣ ሀገር ማለት መንግስቱ እና ፓርቲው ብቻ ሆነው እንዲታሰብ የሚያደርግ አሰራር የሚከተሉ ነበሩ ይሏቸዋል፡፡ መጨረሻቸው ግን፣ የፎከሩበትን ሁሉ ሳይፈፅሙ፣ ደጋፊዎቻቸው የሰጧቸውን “ቆራጡ” የሚል ስያሜ ተግባራዊ ሳያደርጉ፣ ሁሉንም ጣጥለው ፈረጠጡ፡፡ ኮሎኔል መንግስቱ አሁንም በስደት በሀራሬ እንደሚኖሩ ይነገራል፡፡ ሌፍተናል ጀነራል ተስፋዬ ገብረኪዳን በ8 ቀናት የስልጣን ቆይታቸው፣ በአዲስ አበባ እልቂት እንዳይፈፀም፣ ሰራዊቱ ጠመንጃውን እንዲያስቀምጥ መግለጫ ከመስጠት ያለፈ ስራ ሊሰሩ አልበቁም፡፡ ኮሎኔል መንግስቱ፣ በሸሹ በ8ተኛው ቀን፣ ኢህአዴግ አዲስ አበባን ተቆጣጠረ፡፡ (እሸቴ አሰፋ)