July 8, 2020

የኢትዮጵያ ብሔራዊ ምርጫ ቦርድ 27 ፓርቲዎችን ሰረዘ

May 15, 9:01 pm | @FANA


ቦርዱ እስከ መጋቢት 3 ቀን 2012 ዓ.ም. ድረስ በቀድሞ ህግ ሰርተፍኬት የነበራቸው እና በቀድሞው ህግ ምዝገባ ጀምረው ለነበሩ 106 ፓርቲዎች በአዲሱ ህግ ላይ የተቀመጡ መስፈርቶችን እንዲያሟሉ በደብዳቤ ማስታወቁን ጠቅሷል። ከቦርዱ ደብዳቤ ከደረሳቸው 106 የፖለቲካ ፓርቲዎች መካከል 76 የፖለቲካ ፓርቲዎች ሰነዶችን ያቀረቡ ሲሆን በሕጉ መሠረት ተሟልቶ የቀረበ ስለመሆኑ እየተመረመረ ይገኛልም ነው ያለው። በዚህም ፓርቲዎቹ በደብዳቤ የተገለጸላቸውን ነጥቦች ሁሉንም ማሟላታቸውን ማረጋገጥ ( የህገደንብ ለውጥ ጠቅላላ ጉባኤ ሰነዶች አቀራረብ፣ የመስራቶች ፊርማ … የመሳሰሉት)፣ ፓርቲዎች በሕጉ መሠረት ማሟላት የሚገባቸውን የመሥራች አባላት ብዛት ትክክለኛነትን ለመፈተሽ ካቀረቡት የመሥራች አባላት ዝርዝር ናሙና የማውጣት፣ ናሙናዎቹ በትክክል ግለሰቦቹ የተፈረሙ መሆናቸውን ወደተፈረሙበት ቦታ በመላክ ማረጋገጥ እና የህገ ደንብ ለውጦችና፣ የጠቅላላ ጉባኤ ሰነዶች በትክክል መያያዛቸውን የማረጋገጥ ምርመራ እየተደረገ መሆኑንም አስታውቋል። ይህ እንደተጠናቀቀም ሰነዶቻቸው ካስገቡት 76 ፓርቲዎች መካከል ምን ያህሎቹ መስፈርት እንዳሟሉ በቦርዱ ይፋ የሚደረግ ይሆናል። ነገር ግን የሚጠበቅባቸውን ሰነድ ማስገባት ያልቻሉ እና ጊዜ እንዲራዘምላቸው የጠየቁ 16 የፓለቲካ ፓርቲዎች ሲኖሩ ከነዚህ መካከል ከስር የተጠቀሱት የ13ቱ አጥጋቢ ምክንያት ባለማቅረባቸው እንዲሰረዙ ቦርዱ መወሰኑን ገልጿል። 1. የኢትዮጵያውን ዴሞክራሲያዊ አንድነት ንቅናቄ (ኢዴአን) - የመስራች አባላት ዝርዝር ያላቀረበ፣ ጉባኤ ያላካሄደ 2. የገዳ ስርአት አራማጅ ፓርቲ (ገሥአፓ) - የመስራች አባላት ዝርዝር ያላቀረበ 3. የየም ብሔረሰብ ዴሞክራሲያዊ ንቅናቄ (የብዴን) - የመስራች አባላት ዝርዝር ያላቀረበ፣ ጉባኤ ያላካሄደ 4. የደንጣ ዱባሞ ክችንችላ ህዝብ ዴሞክራሲያዊ ድርጅት - የመስራች አባላት ዝርዝር ያላቀረበ፣ ጉባኤ ያላካሄደ 5. የኢትዮጵያ ብሔራዊ አንድነት ኮንግረስ (ኮንግረስ) - የመስራች አባላት ዝርዝር ያላቀረበ 6. የትግረ ወርጂ ብሔረሰብ ዴሞክራሲያዊ ድርጅት (ትወብዴድ) - ጠቅላላ ጉባኤ ያላካሄደ 7. የመላው አማራ ህዝብ ድርጅት (መአህድ) - የመስራች አባላት ዝርዝር ያላቀረበ ጉባኤም ያላካሄደ 8. የኢትዮጵያውያን አንድነት ዴሞክራሲያዊ ድርጅት (ኢአዴድ) - ጠቅላላ ጉባኤ ያላካሄደ 9. የመላው አማራ ህዝብ ፓርቲ (መዐሕፓ) - የመስራች አባላት ዝርዝር ያላቀረበ 10. የኢትዮጵያውያን አገር አቀፍ ንቅናቄ (ኢሃን) - የመስራች አባላት ዝርዝር ያላቀረበ 11. የደቡብ ኢትዮጵያ ዴሞክራሲያዊ ኮንግረስ (ደቡብ ኮንግረስ) - የመስራች አባላት ዝርዝር ያላቀረበ 12. የሸኮና አካባቢው ሕዝብ ዴሞክራሲያዊ ድርጅት (ሸአሕዲድ) - ጠቅላላ ጉባኤ ያላካሄደ 13. ነጻነትና ሰላም ለኢትዮጵያ ህብረት ፓርቲ (ነጻነትናሰላም) - የመስራች አባላት ዝርዝር ያላቀረበ በሌላ በኩል ሌሎች 14 ፓርቲዎች ደግሞ ከቦርዱ በተደረገው ጥሪ መሰረት ሰነዶቻቸውን ያላቀረቡ ሲሆን አንዳንዶቹ ደግሞ ከሌሎች ፓርቲዎች ጋር መዋሃዳቸውን ገልጸዋል፤ በመሆኑም የእነዚህ 14 ፓርቲዎች ሰነድ ባለማምጣታቸው እንዲሰረዙ ቦርዱ ወስኗል። 1. የኢትዮጵያ ራዕይ ፓርቲ 2. መላው ኢትዮጵያውያን ዴሞክራሲያዊ ፓርቲ 3. የከምባታ ሕዝቦች ኮንግረስ 4. የሐድያ ብሔር ዴሞክራሲያዊ ድርጅት 5. የኦሞ ሕዝቦች ዴሞክራሲያዊ ኅብረት 6. የዲል ወቢ ሕዝቦች ዴሞክራሲያዊ ንቅናቄ 7. የቤንች ሕዝብ ዴሞክራሲያዊ ድርጅት 8. የስልጤ ሕዝብ ዴሞክራሲያዊ ፓርቲ 9. የአፋር ሕዝብ ነፃነት ፓርቲ 10. የሶማሌ አንድነት ፓርቲ 11. ነፃነት ለአንድነትና ለፍትሕ ፓርቲ 12. ብሔራዊ ተሀድሶ ለሰላም ልማት 13. የደቡብ ምእራብ ኢትዮጵያ ሕዝብ ህብረት 14. የጋምቤላ ክልላዊ ንቅናቄ ከእነዚህ በተጨማሪም ኢትዮጵያ ዴሞክራሲያዊ ፓርቲ (ኢዴፓ) እና ወለኔ ህዝቦች ፓርቲ በልዩ ሁኔታ ሰነድ ካስገቡ ፓርቲዎች ጋር ሰነዶች እንዲታይላቸው ተወስኗልም ነው ያለው።