September 28, 2020

የብሩስ ሊ ፊርማ?

May 13, 10:30 pm | @Sheger FM


የዚያኑ ዓመት ደግሞ ኢዛቤል የምትባል ልጅ ባኩ: አዘርባጃን ውስጥ ተወለደች።እርሷ የስድስት ዓመት ህፃን እያለች ነበር አባቷ ጆሴ ኤድዋርዶ ዶስ ሳንቶስ የአንጎላ ፕሬዝዳንት የሆኑት። 38 ዓመታት የኖሩበትን ወንበር የለቀቁትም እ.አ.አ በ2017 ነው። በያኔዋ ሶቪየት ህብረት ግዛት ኮሙኒዝምን ሊማሩ በሄዱ ጊዜ የወለዷት የያኔዋ ድንቡሼ ህፃን ከ38 ዓመታት በሁዋላ 'ቢጠሯት የማትሰማ' ቱጃር ሆነች። ከአፍሪካ ሴት ቢሊየነሮች ወደር የለሽም ጭምር። እንዳውም በ2015 ከዓለማችን ተፅዕኖ ፈጣሪ 100 ሴቶች አንዷ እስከመባልም ደረሰች።አባቷ አንጎላን ሰጥ ለጥ አድርገው ሲገዙ: እርሷ ደግሞ የአንጎላን ሀብት ስትገዘግዝ ኖራለች ሲሉም በርካቶች ያብጠለጥሏታል።አባት ዳኛ ልጁ ቀማኛ እንዲሉ። በአባቷ እግር የተተካው መንግስት ግን ዝም አላለም። ኢዛቤል ዶስ ሳንቶስ የአባቷንና የራሷን የፖለቲካ ስልጣኖች ተግና የሀገሪቱን ሀብት መጥምጣለች። በሙስና እና በንቅዘት ጠርጥሬያታለሁና ልፋረዳት እፈልጋታለሁ አለ።እርሷ ፖርቱጋል ሆና 'አልመጣም ቀረሁኝ'ን "አዜመችለት"። በፍርድ ቤት ትዕዛዝ በሀገር ውስጥ ያለ ሀብት ንብረቷ በሙሉ ታገደ። በፖርቱጋልም ያላት ሀብት ንብረት ይታገድልኝ ሲል እየወተወተ ነው-የአንጎላ መንግስት።ኢዛቤል ዶስ ሳንቶስ ከአንጎላ ህዝብ አንጡራ ሀብት ላይ በትንሹ አንድ ቢሊየን ዶላር መዝብራለችም ብሏታል ዐቃቤ ሕግ።ከቅርብ ጊዜያት ወዲህ የት እንዳለች ባይታወቅም ካለችበት ሆና ለፍርድ ቤቱ በላከችው ምላሽ ወትሮም እንደምትለው የቀረበብኝ ክስ ፖለቲካዊ ብቀላ ነው አለች። እንዳውም የኔ ያልሆነ ፓስፖርት የኔ እንዲመስል ተደርጎ ለፍርድ ቤቱ ቀርቧልም ብላለች።ፓስፖርቱ ላይ ሁለት ያልተለመዱ ማስረጃዎች አግኝታበት የእርሷ አለመሆኑን ማረጋገጧን አብራራች። የመለያ ቁጥሩ በፓስፖርቱ ሁለት የተለያዩ ቦታዎች ላይ መፃፉ እና ፊርማው የእርሷ አለመሆኑን። "ፓስፖርቱ ላይ ያለው ፊርማ የኔ አይደለም: የብሩስ ሊ ነው። የብሩስ ሊ መሆኑን አረጋግጫለሁ " በማለትም መከራከሪያዋን ለፍርድ ቤቱ በፅሑፍ አስገብታለች።ፍርድ ቤቱ የሚሰጣት ምላሽ በጉጉት የሚጠበቅ ሆኗል።በፎርብስ ሪፖርት መሠረት የኢዛቤል ዶስ ሳንቶስ የተጣራ ሀብት ከ2.1 ቢሊየን ዶላር በላይ ነው። (ተስፋዬ አለነ)