September 28, 2020

በአዲስ አበባ የአፍና የአፍንጫ መሸፈኛ ማስክ አላደረጋችሁም በሚል አላፊ አግዳሚው እየተጠየቀ ያለው በምን አግባብ ነው?

May 13, 1:14 pm | @Sheger FM


የአፍና የአፍንጫ መሸፈኛ ማስክ ያላደረጉትን ፖሊስ ወደ ለይቶ ማቆያ እንደሚያስገባ ሲናገር ሰምተናል፡፡ የሸገር ባልደረቦችም ይሄው ሁኔታ አጋጥሟቸዋል፡፡ በአዲስ አበባ በታክሲዎች፣ በህዝብ ትራንስፖርት፣ ሕዝብ በሚበዛባቸው ቦታዎች ማስክ ማድረጉ አስገዳጅ ሆኖ መውጣቱ የሚታወቅ ቢሆንም ሁሉም ሰው በግሉ መኪና የሚንቀሳቀሰውም ሆነ ህዝብ ባልበዛባቸው አካባቢዎች የሚንቀሳቀሱ በሙሉ ማስክ ማድረግ አለባቸው የሚል መመሪያ አልሰማንም፡፡ የአዲስ አበባ ፖሊስ ኮሚሽን የከተማዋን ነዋሪዎች የአፍና የአፍንጫ መሸፈኛ ማስክ አላደረጋችሁም በሚል ወደ ቅጣት እርምጃ እየገባ ያለው በየትኛው ህግ ነው? የፖሊስ ኮሚሽኑ የህዝብ ግንኙነት ሀላፊ ኮማንደር ፋሲካ ፋንታ የከተማዋ ፖሊስ እርምጃ እየወሰደበት ስላለው ህግ ለሸገር ከመግለፅ ተቆጥበዋል፡፡ በጉዳዩ ላይ መግለጫ የሚሰጠው ጠቅላይ ዐቃቢ ሕግ፣ የሰላም ሚኒስቴር ወይንም የጤና ሚኒስቴር ናቸው ብለውናል፡፡ ሸገር ወደ ጠቅላይ ዐቃቢ ሕግ ቢደውልም እነሱ የፖሊስ ኮሚሽኑን ጠይቁ የሚል መልስ አግኝቷል፡፡ የሰላም ሚኒስቴርስ ምን ይላል? ሸገር ከሰላም ሚኒስቴር ያገኘው መልስ ጉዳዩን አጣርተን መልስ እንሰጣለን የሚል ነው፡፡ የአፍና የአፍንጫ መሸፈኛ ማስክ አላደረጋችሁም የተባሉ ሰዎች ግን ወደ ፖሊስ ማዕከላት እየተወሰዱ መሆናቸውንም ሸገር ሰምቷል፡፡ ከሕዝብ ትራንስፖርት፣ ከታክሲዎች፣ ህዝብ ከሚበዛባቸው አካባቢዎች ውጪ ባሉ ቦታዎች በአስገዳጅነት የአፍና የአፍንጫ መሸፈኛ ማስክ ማድረግ አስገዳጅ መሆን አለመሆኑን የሚመለከታቸው መስሪያ ቤቶች መልስ ሲሰጡን እንነግራችኋለን፡፡