September 28, 2020

ኢትዮጵያ የኤሌክትሮኒክ ትራንዛክሽንን ማስጀመር የሚያስችል የቴክኖሎጅ ደረጃ ላይ እንደምትገኝ ተገለፀ

May 7, 11:51 am | @FANA


በኤሌክትሮኒክ ትራንዛክሽን ረቂቅ አዋጅ ዙሪያ በህዝብ ተወካዮች ምክር ቤት ከሰው ሃብትና ቴክኖሎጅ ጉዳዮች ቋሚ ኮሚቴ ጋር በነበራቸው ውይይት ወቅት ነው፡፡ ረቂቅ አዋጁ ከሚመለከታቸው ባለድርሻ አካላትና የህግ ባለሙያዎች ጋር ሰፊ ጊዜ የፈጀ ውይይት ሲደረግበት የቆዬ መሆኑን ያስረዱት ሚኒስትሩ በውይይቱም የተገኙ ግብአቶችና አስተያያቶች የተካተቱበት መሆኑን አመላክተዋል፡፡ የኤሌክትሮኒክ ትራንዛክሽን ተንቀሳቃሽ ስልክንና መሰል መሳሪያዎችን ጨምሮ በኮምፒውተር በመታገዝ የኢንፎርሜሽን መረብ ስራን ማከናወን የሚያስችል እንዲሁም የኤሌክትሮኒክ ንግድንና የመንግስት አገልግሎቶችን የሚጨምር ቴክኖሎጂ መሆኑን የ ዶ/ር አብርሃም ገልፀዋል። ˝አሁን የደረስንበት የቴክኖሎጅ መሰረተ-ልማት ደረጃ የተሟላ ነው ባይባልም ባለን አቅም ጀምረን እያጠናከርን መሄድ ይጠበቅብናል˝ ብለዋል፡፡ ሚኒስትሩ ወረቀትንና ኮምፒውተርን ማዕከል ያደረጉ ሰነዶችንና ኢንፎርሜሽኖችን የሚጠቀሙ የህብረተሰብ ክፍሎችን በእኩል ለማስስተናግድ፣ ኢትዮጵያ የኤሌክትሮኒክ ንግድን ጥቅም ላይ እንድታውልና ዜጎች በኢኮኖሚው ውስጥ እንዲካተቱ በማድረግ የዲጂታል ዘመኑን እንድትቀላቀል ለማስቻልና ሁሉን አቀፍ መንግስታዊ ተቋማትን በመገንባት መልካም አስተዳደርን ለማስፈን የሚያስችል ህግ በማስፈለጉ መሆኑን ተናግረዋል። አዋጁ ለነበሩት የንግድም ይሁን የአገልግሎት ህጎች እውቅና የሚሰጥ እንጅ አዲስ ህግ አለመሆኑን ያስረዱት ሚኒስትሩ ሀገሪቱ ይህንን ቴክኖሎጂ መጠቀሟ ዜጎች ባሉበት ቦታ ሆነው የሚፈልጉትን አገልግሎት እንዲያገኙ ያስችላልም ነው ያሉት። በእንዲሁም ዲጂታል ቴክኖሎጂው ውስጥ በመካተት ፈጣን ኢኮኖሚ ለመገንባት የሚያስችል በመሆኑ በፍጥነት ተግባራዊ ሊደረግ ይገባዋል ሲሉም ተናግረዋል፡፡ ቋሚ ኮሚቴው በበኩሉ ረቀቅ አዋጁን አስመልክቶ በሚኒስቴር መስሪያ ቤቱ የስራ ኃላፊዎች የተሰጠው ማብራሪያ በቂ እንደሆነና ነገር ግን ከተደራሽነትና ከቋንቋ አጠቃቀም አኳያ ያሉትን ነገሮች በድጋሚ በመፈተሽ የተስተካከለው ሰነድ አንድ ሳምንት ባልሞላ ጊዜ ውስጥ ለቋሚ ኮሚቴው እንዲደርሰውና በምክር ቤቱ ጸድቆ ወደ ተግባር እንዲገባ ሚኒስቴር መስሪያ ቤቱ ጥረት ማድረግ እንደሚጠበቅበት ማሳሰቡን ከህዝብ ተወካዮች ምክር ቤቱ ያገኘነው መረጃ ያመለክታል።