July 8, 2020

በሶማሌ ክልል የሚገኙ የፖለቲካ ፓርቲዎች የምርጫ ጊዜ መራዘሙን ተከትሎ በወቅታዊ ጉዳዮች ላይ የጋራ ምክክር አደረጉ

May 6, 3:15 pm | @EBC


በውይይቱ የተካፈሉት የፖለቲካ ድርጅቶች ምዕራብ ሶማሌ ዲሞክራሲያዊ ፓርቲ ፣ህብረት ለዲሞክራሲና አንድነት ፓርቲ ፣የዱቦና ደግኖ ዲሞክራሲያዊ ፓርቲ ፣ የዲል ወቢ ፓርቲ እና የሶማሌ ክልል ብልፅግና ፓርቲ ናቸው፡፡ የኮቪድ 19-ን ወረርሽኝ መስፋፋትን ተከትሎ የኢትዮጵያ ብሄራዊ ምርጫ ቦርድ የምርጫ ቅድመ ዝግጅት ስራዎችን በዕቅዱ መሰረት ማከናወን ባለመቻሉ ሀገራዊ ምርጫው በተያዘለት የጊዜ ሰሌዳ ሊደረግ እንደማይችል ለህዝብ ተወካዮች ምክር ቤት ውሳኔ እንዲሰጥበትና ምርጫው እንዲተላለፍ መደረጉ ላይ ፓርቲዎቹ ተወያይተዋል ፡፡ በዚህም የኮቪድ-19 ወረርሽኝ ስርጭትን ለመከላከል ለነሐሴ መጨረሻ ተይዞ የነበረው አገራዊ ምርጫ መራዘሙ ተገቢ መሆኑን የፖለቲካ ፓርቲ አመራሮች በዛሬው ዕለት ባደረጉት ውይይት ገልፀዋል ፡፡ በፖለቲካ ዙሪያ መነጋገር የሚቻለው የዜጎች ደህንነት እና የአገር ህልዉና ሲረጋገጥ በመሆኑ ፣መጀመሪያ ሁሉም ዜጋ ሳይለያይ ከመጣው ወረርሽኝ ራሱንና ማህበረሰቡን እንዲጠብቅ ፓርቲዎቹ አስታውሰዋል፡፡ የኮቪድ-19ን የመከላከል ስራ ተጠናክሮ መቀጠል እንዳለበት የገለጹት የፓርቲ ተወካዮቹ ፣በጥናት የተለዩ አራት ህገ-መንግስታዊ አማራጮች መቀመጣቸው የአገር ህልውና አደጋ ላይ እንዳይወድቅ የመፍትሄ አቅጣጫዎች ቢሆኑም ከሁሉም አማራጮች ይልቅ ይህዝብ ተወካዮች ምክር ቤት ያፀደቀው ህገ-መንግስት ትርጓሜ መጠየቅ የሚለው አማራጭ የተሻለ በመሆኑ በጉዳዩ ላይ ተመሳሳይ አቋም መያዛቸውን ተናግረዋል፡፡ ምንጭ፡- የሱማሌ ብዙኃን መገናኛ ድርጅት