March 31, 2020

ከምርጫ ሂደት ጋር በተያያዘ የሚያጋጥሙ ክርክሮችን የሚዳኙ ችሎቶች ሊደራጁ ነው

February 14, 12:31 pm | @EBC


በቅርቡ የወጣው አዋጅ ቁጥር 1162/2012 ወደ ፍርድ ቤት ሊቀርቡ የሚችሉ የምርጫ ሂደት አከራካሪ ጉዳዮችን በዝርዝር ደንግጓል። በዚህ አዋጅ ላይ የስነ-ምግባር ጥሰት፣ የመራጮች እና የእጩዎች ምዝገባ፣ የድምጽ ቆጠራ እና ውጤት አገላለጽን ጨምሮ ሌሎች ሊኖሩ የሚችሉ የምርጫ አካሔድ አከራካሪ ጉዳዮች በዝርዝር መቀመጡን የኢትዮጵያ ዜና አገልግሎት ዘግቧል። የፌዴራል መጀመሪያ ደረጃ ፍርድ ቤት ምክትል ፕሬዚዳንት አቶ ተስፋዬ ንዋይ እንደገለጹት፤ ፍርድ ቤቶች የምርጫ ጉዳዮችን የሚታዩባቸውን ችሎቶችን ለማደራጀት ከብሔራዊ የምርጫ ቦርድ ጋር እየተሰራ ነው። በሚደራጁት ችሎቶች የሚታዩ ጉዳዮች መለየታቸውንም ጠቁመዋል። ፍርድ ቤቶችን የማደራጀት እና በምርጫ የሚነሱ ክርክሮችን የሚያዩ ዳኞችን የመደልደል ስራ የመራጮች ምዝገባ ከመካሔዱ አንድ ወር በፊት መፈፀም እንዳለበት በአዋጁ መደንገጉን ገልጸው፤ በዚሁ መሰረት እየተሰራ መሆኑንም አንስተዋል። ከብሔራዊ ምርጫ ቦርድ ጋር በመሆን ደግሞ የፍርድ ቤቱን ተቋማዊ ነፃነት ባልተጋፋ መልኩ የምርጫ ችሎቶችን ለማደራጀት እየተሰራ መሆኑንም አስረድተዋል።