April 7, 2020

በዲሞክራቲክ ሪፐብሊክ ኮንጎ የተከሰተው የኢቦላ ወረርሽኝ ላልተወሰነ ጊዜ የዓለም የጤና ስጋት እንደሆነ እንደሚቀጥል ተገለፀ

February 13, 4:49 pm | @EBC


የዓለም የጤና ድርጅት ዋና ዳይሬክተር ዶ/ር ቴድሮስ አድሃኖም በጄኔቫ ለጋዜጠኖች እንደተናገሩት “እንደ ምስራቅ ዲሞክራቲክ ሪፐብሊክ ኮንጎ ደህንነቱ ባልተረጋጋ አካባቢ አንድ የኢቦላ ተጠቂ እስከታየ ድረስ ወደ ወረርሽኝ የመለወጥ ዕድሉ ከፍተኛ ነው” ብለዋል፡፡ ከዓለም ዙሪያ የተውጣጡት የዓለም የጤና ድርጅት የአስቸኳይ ጊዜ ሁኔታ ኮሚቴ አባላት በሰጡት ምክረ ሃሳብ መሠረት የአስቸኳይ ጊዜ ድንጋጌው በሚቀጥሉት ሦስት ወራት ውስጥ ሊነሳ እንደሚችል ዶ/ር ቴድሮስ ተናግረዋል፡፡ የኢቦላ ወረርሽኝ “አስቸኳይ ዓለም አቀፍ የህብረተሰብ ጤና ስጋት” እንደሆነ ባለፈው ሐምሌ ወር ላይ ነበር የዓለም የጤና ድርጅት ያስታወቀው፤ ይህም የተባበሩት መንግስታት የጤና ኤጀንሲ ጉዞን ለመገደብ እና የገንዘብ አቅሙን ለማሳደግ ያስችለዋል ነው የተባለው፡፡ በኮንጎ ባለፈው ሳምንት ሦስት ሰዎች ብቻ በኢቦላ መያዛቸው ሪፖርት መደረጉን ዶ/ር ቴድሮስ አስታውቀዋል፤ ሆኖም ወረርሽኙ ቆሟል ብሎ ለማወጅ ለ42 ቀናት አዲስ ታማሚ ሪፖርት መደረግ እንደሌለበት ነው የተገለፀው፡፡ እ.ኤ.አ. ከ2014 ጀምሮ በጊኒ፣ ላይቤሪያ እና ሴራሊዮን ወደ 11,000 የሚጠጉ ሰዎችን ከገደለው ወረርሽኝ ቀጥሎ በቅርቡ የተከሰተው ይህ ሁለተኛው ከባድ ወረርሽኝ ለመጀመሪያ ጊዜ የታየው እ.ኤ.አ. በነሐሴ ወር 2018 በምሥራቅ ዲሞክራቲክ ኮንጎ በርካታ ሚሊሻዎች በሚንቀሳቀሱበት አካባቢ ሲሆን እስካሁን ከ2,300 በላይ ሰዎችን ገድሏል፡፡ በጤና ባለሙያዎች ላይ የተሰነዘሩ ጥቃቶች እና በምስራቁ የሀገሪቱ ክፍል የተከሰቱ ግጭቶች ወቅታዊውን ወረርሽኝ ለመቆጣጠር የተደረጉ ጥረቶችን አስተጓጉለዋል ነው የተባለው፡፡ ምንጭ፡- አልጀዚራ