April 7, 2020

በኢትዮጵያ በኮሌራ ወረርሽኝ 76 ሰወች ለህልፈት ተዳርገዋል

February 13, 3:59 pm | @FANA


በወረርሽኙ በአዲስ አበባ፣ አማራ፣ ትግራይ፣ ኦሮሚያ፣ ደቡብ፣ ድሬዳዋ፣ ሐረር እና ሶማሌ ክልሎች ከ4 ሺህ በላይ ሰወች መያዛቸውን፥ የኢትዮጵያ የሕብረተሰብ ጤና ኢንስቲቲዩት በባክቴሪያ የሚመጡ በሽታዎች ቅኝትና ምላሽ ሰጪ ቡድን አስተባባሪ አቶ ሙከሚል ሁሴን ተናግረዋል። ወረርሽኙ ከተከሰተበት ጊዜ ጀምሮ በተሰራው ሥራ በአብዛኛዎቹ ቦታዎች በሽታውን መቆጣጠር መቻሉንም ነው የተናገሩት። ይሁንና በኦሮሚያ፣ ደቡብ እና ሶማሌ ክልሎች አሁንም በሽታው በወረርሽኝ መልክ ተሰራጭቶ እንደሚገኝና በበሽታው የሚያዙና የሚሞቱ ሰዎች ቁጥርም እየጨመረ መሆኑን ገልጸዋል። ካለፈው ዓመት ጀምሮ በተከሰተው በዚሁ የኮሌራ ወረርሽኝ እስካሁን ድረስ 76 ሰዎች ሕይወታቸው አልፏል ነው ያሉት። ወረርሽኙ በአሁኑ ወቅት በደቡብ ክልል በ11፣ በኦሮሚያ በሦስት እንዲሁም በሶማሌ ክልል በሁለት ወረዳዎች በድምሩ በ16 ወረዳዎች እንደሚገኝ ጠቁመዋል። በኦሮሚያ ክልል ጉጂ ዞን አዶላ ሬዴ እና አባያ ወረዳዎች፣ በደቡብ ክልል በጎፋ ዞን ደብረፀሐይ እና ዛላ ወረዳዎች፣ በጋሞ ዞን ጋራ መርታ ወረዳ እና ከምባ ወረዳ፣ በደቡብ ኦሞ ዞን ሰላማጎ፣ ማሌ እና አሌ ልዩ ወረዳ እንዲሁም በኮንሶ ዞን እና ጌዴኦ ዞን ወናጎ ወረዳ ላይ ወረርሽኙ ተከስቷል ብለዋል። ከዚህ ባለፈም በሶማሌ ክልል ዳዋ ዞን ሞያሌ ወረዳ ላይ ወረርሽኙ ዳግም መከሰቱንም ነው አስተባባሪው የገለጹት። በአጭር ጊዜ ለሞት የሚዳርግ በመሆኑም ሕብረተሰቡ ምልክቶቹን በሚያይበት ጊዜ በአፋጣኝ ወደ ሕክምና ተቋም መሄድ እንዳለበት ማሳሰባቸውን ኢዜአ ዘግቧል። የዓለም ጤና ድርጅት መረጃ እንደሚያሳየው በየዓመቱ ከ1 ነጥብ 3 እስከ 4 ሚሊየን ሰዎች በኮሌራ በሽታ የሚያዙ ሲሆን ከእነዚህ መካከል ከ21 ሺህ 143 በላይ ሰዎች ሕይወታቸው ያልፋል።